城中鏡：張宗琪做衫中西合璧

依家做嘢最緊要創新，連已有六十二年歷史嘅度身訂造男裝品牌詩閣（Ascot Chang）亦唔例外。早幾日我哋見到詩閣董事總經理張德祥同姪仔Tony張宗琪，Tony透露正設計一款兩面皆可穿着嘅外套，一面係中山裝，另一面就係西裝。一件外套點樣做到中西合璧？Tony笑笑口話要賣吓關子喎。

張德祥（左）同張宗琪齊搞創新設計。

除咗搞創意設計，Tony最近忙於搞下周喺上海搞嘅大型推廣活動。佢話詩閣進軍內地已經二十幾年，但從未喺內地舉行大型活動，希望可以藉此提升香港品牌形象。今次仲特登搵星級名人設計慈善袖口鈕，屆時籌得嘅善款將捐畀慈善機構。