城中鏡：黃宜弘變老頑童
灣仔會展尋日舉行十‧一酒會，好多政商界名人出席，包括被傳因病休假半年嘅民政事務總署署長陳甘美華，仲有做完肺癌手術嘅立法會前議員「IQ博士」黃宜弘。現場見IQ博士騎着一架電動三輪車到場，成個老頑童咁款，吸引好多人注意，馬會大董梁高美懿見到都忍唔住上前打量一番。
梁鳳儀（左）陪伴黃宜弘騎三輪車到場，梁高美懿（右）甚感好奇。
陳甘美華久休後復出。
楊全盛（左）巧遇恩師黃錦輝（右）。（互聯網圖片）
IQ博士身穿全白西裝，騎着三輪車穿梭會場，非常風騷，佢太太梁鳳儀就陪伴在側。IQ博士話佢做完手術後身體恢復得好好，但經常唔夠氣，所以用三輪車代步。
梁鳳儀就話部車係喺美國行醫嘅細仔黃群恩送畀IQ博士嘅，呢款車喺外國好普遍，可以駛至機場登機閘口，夠晒方便，所以IQ博士好鍾意，經常坐住周圍去。好多朋友見佢好似小朋友踩單車咁，都大讚好得意。個仔咁有孝心，難怪IQ博士愛不釋手喇！
陳甘美華清減咗
由今年二月初開始放足半年假嘅陳甘美華就明顯清減咗，有傳佢因病而無法返工，外界都好關注佢近況，記者趁機問佢係咪因病休假，佢冇正面回應，至於身體如何，佢就答OK，其後急急腳離場。同場嘅立法會議員盧偉國就話有問候陳甘美華健康狀況，佢一樣答覆OK，至於係咪病咗，佢就話涉及私隱不便評論。
香港軟件行業會會長楊全盛就喺酒會上巧遇恩師中文大學工程學院副院長黃錦輝，楊全盛笑稱當年最鍾意上黃錦輝嘅通識堂，因為佢把握上堂時間瞓覺，仲瞓得好舒服添！
