政壇：搞搞政：政改甩轆孭鑊 葉國謙棄區選
立法會喺六月表決政改方案時，建制派因為要「等埋發叔」而甩轆離場，令方案喺八票贊成、二十八票反對之下被否決，留下咗歷史印記。帶頭拉隊離場嘅立會議員「阿謙」葉國謙，同埋堅持等埋發叔嘅林健鋒被質疑責任最大，特別係公認係「建制派班長」嘅阿謙，事後被建制派批評指揮混亂，內訌一度白熱化。
政改甩轆鬧出笑話，之後更引爆建制派WhatsApp對話洩密風波，外界都將矛頭直指阿謙。雖然阿謙事後公開致歉，又公開承認自己要承擔不可推卸嘅責任，不過若想因此避過受罰，就真係異想天開喇！
果然事發三個幾月，阿謙所屬嘅建仔尋日公布嘅區議會選舉名單冇佢份，即係話佢唔會再出選中西區區議會觀龍選區，結束佢二十年區議員生涯。同時亦意味佢失去循區議會第一功能界別躋身立會嘅資格。如果佢明年唔會轉地區直選出戰立會選舉嘅話，佢就會同時失去區議會同立會嘅議席，「班長」一職亦自然要拱手讓人，淪為「三失」老人。
除咗阿謙之外，亦有傳立法會超級議員陳婉嫻唔會再參選嚟緊嘅區議會。同陳婉嫻同屬工聯會嘅立會議員黃國健承認，該會前日通過咗區議會參選名單，當中並冇嫻姐個名，亦即嫻姐唔選區議會之餘，亦唔能夠以區議會第二功能界別嘅途徑參選明年嘅立會。
而該會立會議員王國興今日會報名出戰區議會選舉小西灣選區，頂替喺該區擔任區議員二十年嘅陳靄群，似乎亦都為接替嫻姐埋下伏線。
