政壇：馬斐森變臉 言論反覆

盧寵茂收粗口「問候」電郵

話口未完，港大校委之一盧寵茂嘅港大電郵信箱尋日一早收到大量「問候」信，夾雜「Ｘ你老母Ｘ家剷」等粗口，佢認為同佢作為校委嘅身份有關。

上月二十九日校委會作出決定後，馬斐森話對結果感到失望，但亦話會尊重校委會嘅決定，只因校委對港大最佳利益有唔同嘅定義。惟事隔一日，有外媒披露馬斐森指自己同支持陳文敏嘅校委飽受施壓，仲話唔排除北京喺背後介入副校遴選，言論令人嘩然。

馬斐森尋日出席十．一酒會，可能有感前日言論太「惹火」，所以被問及此事時冇正面回應，只係話每名校委都有自己嘅理由，以大學利益為依歸而作出決定。講講吓，佢突然狠批港大學生會會長馮敬恩破壞保密原則，大爆校委閉門發言內容，認為校委會討論內容應要保密，一時之間又同校委會主席「金刀梁」梁智鴻同一陣線，言論反覆且變臉速度極快。唔知係咪又有人干預佢呢？

講開副校風波，仍然餘波蕩漾。港大學生會已表示唔排除發動罷課，將喺下周商討跟進行動，但要等待師生討論先做決定。至於港大教師及職員會主席張星煒則揚言考慮策劃罷教，喺下周開始進行民調，收集教職員對今次校委會決定同罷教、罷課嘅意見，預計最快三星期後有結果。而港大校友關注組召集人葉建源更表明，考慮就校委會決定提出司法覆核，亦公開支持馮敬恩為公義破壞保密原則嘅做法。咁搞法，睇嚟真係有排亂。