城中鏡：郭基煇踩車 悟四大道理
近期有電影以踩單車為主題，掀起踩單車熱，原來新鴻基地產執行董事郭基煇亦踩單車上晒癮，一個禮拜起碼練三次，喺三、四個月前更正式跟教練學嘢，備戰下月單車節，教練都大讚佢嘅狀態同運動員有得比；今年三月結束運動員生涯嘅「鐵血女車神」黃蘊瑤則希望單車運動可由比賽層面擴展到社區。
郭基煇踩單車踩到上晒癮，起碼一個禮拜練三次。
大會今次邀請咗一百五十個基層家庭參與單車節。
黃蘊瑤（左）與雷雄德分享感受，前者希望單車運動由比賽層面擴展到社區。（受訪者提供）
旅遊發展局同新鴻基地產合辦首屆「新鴻基地產香港單車節」，將喺下月十日同十一日喺尖沙咀舉行，大會邀請咗一百五十個基層家庭參與單車節，而新地主席兼董事總經理郭炳聯、執行董事郭基煇兩叔姪，都身體力行，分別參加「總裁慈善單車遊」同「三十五公里挑戰組」。尋日趁中秋節追月日直擊郭基煇練習，現場見郭基煇戴頭盔、全套運動衫、踩住幾萬元「戰車」，一副專業單車運動員look。自認貪靚嘅郭基煇笑言一身打扮鮮艷到似燈籠，好應節，又話以前大學讀書時，喺校園hea住踩單車，三、四個月前先正式跟教練學嘢。
貧富共享 幫助成長
郭基煇又話從踩單車領悟到四個大道理，第一，踩單車老少咸宜、無分貧富，無論幾十蚊租單車，定幾萬蚊買架單車，都可享受樂趣；第二，由依賴父母到自己學識踩單車嘅過程，雖然會不斷跌倒，但亦會有所成長；第三，單車比賽係群體活動，一個車群並肩作戰減低風阻、守望相助；第四，踩單車可以幫自己訂下目標，勇往直前，應對逆境。
港隊單車代表隊前成員兼教練梁志賢讚郭基煇勤力，由最初時速二十五公里進步到四十公里。浸會大學體育學系副教授雷雄德就希望活動令港人多運動。
