政壇：和統會下月搞「光復」
本土派喺今年初起，一連多個周日舉行反水貨客嘅「光復」行動，建制派異口同聲批評行動影響內地旅客來港意欲，但話雖如此，由一批親中人士組成嘅中國和平統一促進會香港總會，原來都打算搞「光復」行動，但此「光復」同反水貨客毫無關係，和統會香港總會搞嘅係台灣光復，計劃喺下月五日搞紀念抗戰勝利暨台灣光復七十周年大會。
活動籌委會執行主席姚志勝話今次活動包括紀念台灣光復嘅內容，體現香港「一國兩制」嘅特色，會上將會宣讀和平宣言，亦會播放抗戰專題紀錄短片，內地有關方面會向抗日老戰士頒發紀念章，預計有一千多人參與。有知情人士話，今次係內地以外最大型嘅抗戰紀念活動，估計國民黨、親民黨等台灣政黨亦會有成員以個人身份到場，強調唔會邀請身份敏感嘅人士到場。
