政壇：三個「20」傍身 周伯展「睛」明
香港眼科醫學院院長周伯展身為眼科專科醫生，竟然能醫不自醫？周伯展話自己細個嘅時候，已經好鍾意睇武俠小說，仲要一睇就睇好耐，唔捨得去休息，最終就搞到近視要戴眼鏡。佢其後又專業拆解近視成因，指其中一種係因後天環境同埋一啲用眼嘅壞習慣所致，另一種近視係同遺傳有關。
周伯展話自己細個唔識護眼，搞到有近視要戴眼鏡。
對於護眼之道，周伯展有秘訣傍身，就係望一樣嘢五至六秒，就要眨一下眼，同埋奉行三個「二十」原則，即係望近嘅嘢二十分鐘後，就將視線移開二十秒，再望二十呎外嘅嘢。話時話，如果周伯展細個有咁做，可能依家就唔使戴眼鏡喇！
講番周伯展任創會會長嘅睛彩慈善基金，原來至今成立約一年，直至最近先搞成立典禮暨籌款晚宴，佢話因為想做到成績先伸手問人攞錢喎。
