政壇：狄志遠 黃成智 兩面不是人
喺政改方案被否決後，「後政改」嘅政團整合陸續上演，其中白鴿黨兩名前成員狄志遠同黃成智正式宣布，籌備成立名為「新思維」嘅新政黨，兩人分別出任召集人同副召集人，希望可以以溫和務實態度，走非泛民及非建制嘅第三條道路。佢哋為咗推銷新黨，亦去得好盡，不惜大晒三十多年前嘅舊相合照，據知該張合照拍攝於七九年，當時狄、黃兩人喺信義會芬蘭差會一齊做社工，但新政黨甫籌組，黃成智率先承認有被批評為「兩面不是人」。
狄志遠（左）同黃成智為推銷新政黨，大晒三十多年前嘅舊相。
據了解，「新思維」目前仍然處於籌備委員會階段，喺明年一月初正式成立，至今約有二十名成員，包括白鴿黨前總幹事陳家偉、葵青區議會前主席周奕希等數名白鴿黨前成員，而未來更會積極考慮派人參選多場選舉。
不與外國政團合作
狄志遠喺傳媒茶敍時話，明白建制派會覺得佢哋係泛民，泛民會覺得佢哋係建制派，「新思維」會做好建立論述嘅工作；黃成智亦承認佢哋選擇所走嘅路向，有被批評為「兩面不是人」；至於資金來源方面，「新思維」表明唔會同外國政治團體合作，以及接收外國資金捐款，現時已籌得約七十萬至八十萬元經費，目標係爭取今年籌得三百萬元，至今無迹象顯示款項係由同一個人包辦。
黃成智重申，無意挖角白鴿黨成員，又承認有個別白鴿黨地區人士曾表示有意加入，佢表明叫對方「睇定啲先」。對於「乳鴿」沙田區議員麥潤培等多人早前退出白鴿黨，黃指對方容易得罪人，非「新思維」招攬目標，亦相信對方無意加入「新思維」。
