大律師公會前主席石永泰不時大聲開炮,今年初佢曾經大鬧有啲香港人,為咗利益就卑躬屈膝、委曲求全、跪地求饒,尋日佢又再發炮喇!今次就將矛頭轉向啲不文明同財大氣粗嘅內地遊客,連高官、學者都鬧埋。

批港府唔撐香港人

石永泰尋日喺港台節目《香港家書》大談香港同內地嘅價值分歧,直指有啲內地人說話狂妄,恃住有錢就「一朝得志,語無倫次」,有內地人喺外地被批評,會話如果唔係佢哋嚟買嘢,當地經濟早就玩完。石永泰反駁,內地遊客到外地旅遊購物,買嘅係服務態度、信譽、品味同安全感,唔係一種施捨,唔明點解嗰啲內地人會有呢種扭曲嘅概念,以為有錢就大晒。

佢又話,留意到內地官方亦不時話,內地依家係強國、大國,有自信、有底氣,好多人等住賺中國嘅錢,唔知係咪呢啲語調,令到部分內地人過度自信,「一朝得志,語無倫次」喎。講完內地遊客,石永泰又批評內地不斷有高官同學者,透過唔同渠道用一啲完全唔恰當兼家長式嘅方法,講一啲同香港人生活方式同價值觀格格不入嘅嘢,令人感覺「不是太過良好」。佢仲鬧埋港府,話即使港人冇做錯,亦得唔到自己政府撐。

石永泰嘅「牢騷」反映咗唔少港人嘅心聲,但香港近年有人高舉龍獅旗同公然搞港獨,又有人發動「驅蝗」、「光復」等針對內地人嘅暴力示威衝擊,同樣令內地政府同人民好唔開心,講到尾,一國兩制需要更多溝通同融合,淨係躁底,解決唔到問題噃!

第一手消息請下載on.cc東網iPhone/iPad/Android/Windows Phone Apps