民陣前晚選出岑子杰（前左一）接替陳倩瑩（前排中）出任召集人。（互聯網圖片）
由多個泛民政團同民間團體組成嘅民間人權陣線，喺○三年嘅七一遊行攀上高峰，但之後就不斷走下坡，包括畀啲新興激進同本土派組織批評為「左膠」，每次搞遊行集會只識「唱Ｋ」，缺乏實質行動同成效等，喺佔領行動後仲一度傳出後繼無人。民陣前晚進行改選，終於選出同志團體「彩虹行動」嘅代表岑子杰（Jimmy）接替陳倩瑩做新召集人，下月正式上任。
Jimmy同我哋講，由於未來一年有兩場大型選舉，相信各泛民黨派同團體都忙於對外宣傳，因此佢會集中精力搞好對內工作，加強現有民陣團體嘅溝通，並希望招攬多啲新團體加入，帶領民陣「中興」。
對於自己嘅同志身份，Jimmy話民陣以前都有女同志做過召集人，佢唔係第一位，強調自己會公平處事，上任後唔會偏袒性小眾團體或相關議題。佢又話，向來同民陣裏面嘅教會團體代表相處融洽，唔覺得會有問題。
第一手消息請下載on.cc東網
