政壇：陳日君逍遙法外佔中死都拗翻生

佔中三子、雙學首腦同多名泛民人士，近日先後接受傳媒訪問回顧佔中一周年，大部分都承認歷時七十九日嘅佔領行動係失敗收場，逼唔到中央同特區政府就政改問題作出任何讓步。不過，天主教香港教區前主教陳日君，尋日就喺電台死撐佔領行動冇失敗，認為當日逼到政府失去理性，向示威者施放催淚彈，已經係勝利嘅表現喎。唔通喺陳日君心目中，佔領行動嘅目的並非爭取真普選，而係爭取警方施放催淚彈？

陳日君之前講過，曾多次建議佔領人士自行撤離，但班學生哥當佢啲說話係耳邊風。佢尋日補充，就算再嚟多一次，佢都會提出同樣建議，認為提早自行退場好過畀警方清場，不過咁樣並唔影響成個行動嘅成與敗，真係乜都畀佢講晒。

記得陳日君早前曾撰文，對自己至今未被警方「預約拘捕」感到慚愧，指多名學生領袖先後被拘控，自己作為成年人卻「逍遙法外」，令人覺得法律面前並非人人平等，非常寸嘴。依家佢又獨排眾議，話佔領行動有成功冇失敗，真係非一般人可以理解。