社交網站Facebook(fb)嘅功能愈嚟愈多,好多人都鍾意流連喺fb,連議員都唔例外。不過,用fb都要注意保安問題,如果唔係就隨時中招,好似立法會議員「一舊雲」黃碧雲咁,日前一唔小心打開咗fb上嘅連結,就連累接近三千名朋友中招,搞到佢哋都收到相同連結。如果佢嘅朋友都打開連結,仲會產生連鎖效應,連累更多人中招。一舊雲真係累街坊。

一舊雲話,日前有朋友透過fb傳送一條連結畀佢,佢諗住條連結可以製作個人頭像,一時興起就按入連結。點知入到連結網站就乜都無,仲自動拎晒佢fb上近三千名朋友嘅資料,然後用佢fb名義傳送同一條連結,當中有人不幸中招。雖然為時已晚,但一舊雲仍然逐個發訊息,提醒佢哋唔好按下連結,希望可以亡羊補牢,防止朋友嘅資料被盜取作宣傳用途。可惜有一至兩成人收唔佢嘅訊息,唔通因為呢件事嬲咗佢,仲unfriend咗佢?

老公曾誤上淫網

講開有問題嘅連結,原來一舊雲老公都中過招,情況比佢更尷尬添。事緣佢老公喺fb收到一條連結,點知一撳入去竟然連結咗去色情網站,仲自動透過fb發訊息畀朋友,話畀朋友知佢啱啱登入過咩色情網站,連色情級數都話埋畀人知。唯一好彩嘅係,一舊雲老公fb上嘅朋友唔係好多,而朋友收到後亦即刻通知佢,阻止尷尬事繼續蔓延。

對於老公鬧出上色情網站嘅笑話,一舊雲唔單止無嬲,仲講笑話對方唔似自己咁「濫交」,即係唔會隨便接受交友邀請。而佢因為工作需要,基本上有朋友邀請就會接受,除非對方fb上有好多奇怪嘅相。但經過今次事件,一舊雲話考慮提升fb嘅保安級數,例如係雙重認證,以免重蹈覆轍咁話。

第一手消息請下載on.cc東網iPhone/iPad/Android/Windows Phone Apps