早前傑出青年協會（傑青會）率領一班學生去北京交流，日前就舉行交流分享晚宴。見到曾當選過傑青嘅香港天文台前高級科學主任Eddy李偉才，佢話依家環境問題比大家想像中嚴峻好多，若不正視，地球人將活不過呢個世紀。Eddy話其實六年前喺丹麥哥本哈根會議時，各國已好着緊減碳問題，可惜時任特首「貪曾」曾蔭權爵士漠視該問題，被批「氣候逃犯」。

李偉才話環境問題要與內地合作才能改善。

黃傑龍（右）同本地設計師丘雪祺均曾獲選香港十大傑青。

語言及聽覺訓練學家龐劉湘文（左）係九一年傑青，可謂身旁甄韋喬嘅前輩。

今年十一月底國際氣候高峰會議會喺法國巴黎舉行，Eddy話問題已比之前仲嚴重，而香港難以獨辦去碳計劃，必須同內地廣東省緊密合作，故若中港矛盾持續，年輕人唔願同內地合作，問題就好難改善。

甄韋喬籲家長灌輸正確價值觀

同場仲有前傑青、叙福樓集團執董Simon黃傑龍，講到名廚Jamie Oliver坦承推動學生飲食健康失敗，認為只有中上層人士先有條件注重飲食，Simon就覺得兩者無衝突。佢舉例，之前推出代用飯餐有好多唔同選擇，以為豆腐同蔬菜較適合長者，點知結果係長者個個都揀豬扒餐，因覺得豆腐價平，自己都買到，相反豬扒貴啲又難煮，反映基層會滿足基本所需營養後，先再講健康啫！

講番傑青帶班學生去完北京交流，主席甄韋喬覺得年輕人嘅性格同能力，同家長如何培養有密切關係，佢發現依家除怪獸家長外，亦有部分家長驚影響親子關係，而逃避向子女灌輸正確價值觀，佢認為家長有重要事情就一定要交代清楚，唔可以避而不談喇！

第一手消息請下載on.cc東網iPhone/iPad/Android/Windows Phone Apps