公文袋嘅黨魁兼立法會議員「袋巾傑」梁家傑曾多次透露打算退落嚟，希望個黨可以實現年輕化，但該黨內部矛盾相當嚴重，「狗咬狗骨」並非新鮮事，於是有人建議由黨內較四平八穩嘅法律界議員郭榮鏗接任黨魁。但按該黨黨章，要直選議員先可擔任黨魁，莫非要改黨章度身訂造接班人？

睇吓公文袋幾位立會議員，包括陳家洛同毛孟靜不咬弦已係公開嘅秘密，其中一人做黨魁相信只會加劇該黨內部分化。至於今屆重返立會嘅郭家麒亦被指不成氣候，所以暫且不理該黨係咪有其他人參選下屆立會選舉，似乎郭榮鏗係揀無可揀嘅黨魁人選。

但公文袋黨章規定，黨魁唔單止要係立會議員，仲要由地方直選產生。郭榮鏗嚟自法律界功能界別，基本上唔符合擔任黨魁嘅規定。黨內就有聲音認為，由直選議員擔任黨魁嘅規定有修改嘅空間，因為除咗傳統功能界別，今屆立會新增嘅超級區議會議席，雖然都係嚟自功能界別，但唔能夠否認確實有一定民意認受性，如果該黨將來產生超級議員，係咪又要否定該議員嘅黨魁資格呢？有關規定似乎已不合時宜。

該黨員續稱，如果刪除有關要經地方直選產生黨魁嘅字眼後，超級議員同其他傳統功能界別議員亦合乎出任黨魁嘅資格，變相令黨魁嘅選擇得以擴闊，而事實上該黨過往亦試過唔止法律界一位功能界別議員。不過，唔好忘記公文袋係反對一二年政改方案，依家為咗修改黨章不惜「打倒昨日的我」合理化超級區議會議席有民意認受性，豈不是「龍門任你擺」？

第一手消息請下載on.cc東網iPhone/iPad/Android/Windows Phone Apps