政壇：利邦CEO高顯仁 由細浸住名牌大
利邦搵埋唔少猛人加盟，喺舊年五月上任嘅CEO高顯仁（Richard Cohen）來頭猛，阿爸係Burberry英國區業務阿頭，故Richard體內自細就係流住藍色血（Blue Blood），浸住名牌大。
高顯仁話自己年紀大，今次嚟利邦係「最後一試」。
講番Richard，佢自細跟阿爸學嘢，十八歲踏出英國，住過法國、西班牙、意大利等地，直至二十一歲暫時喺紐約定落嚟。
佢今年六十歲，但就已經有四十年服務同零售業嘅經驗，仲唔係一般公司添，佢做過意大利名牌Ermenegildo Zegna北美業務嘅CEO，係咁意都做咗十六年。
而加入利邦前，佢就做緊奢侈品連鎖百貨Saks Fifth Avenue嘅業務發展高級副總裁。幾乎半世人都浸住名牌！
聽講，係馮氏集團副主席兼利邦非執董馮國綸邀Richard加盟，幫手發大盤生意，佢覺得可以「Give it a try（試吓）」，但又慨嘆自己年紀大，今次係「最後一試」咁話。利邦上星期宣布旗下品牌Kent & Curwen簽咗五年獨家約，可以用咸爺（碧咸）嘜頭，聽Richard講單刁原來都傾咗好幾個月，佢仲讚咸爺喺行商方面好學不倦添！話時話，今年上半年，利邦自上市以嚟首錄虧損，今次可否靠咸爺嚟個華麗翻身呢？等睇等睇。
