政壇:阿Dick組新黨 大水喉射住
白鴿黨創黨成員Dick狄志遠喺月初宣布退黨,夥拍被踢出白鴿黨嘅立法會前議員黃成智籌組新政黨「新思維」,走中間溫和路線。正所謂萬事起頭難,籌組新黨實要面對無數難題,點知阿Dick已經搵到大水喉,新政黨未成立已經非常疊水。
阿Dick自知社會走向兩極,只有泛民同建制兩大陣營,已預料到開拓新路線嘅新思維會腹背受敵,而坊間亦會認為定位唔夠清楚。有見及此,阿Dick已經請咗專業公關,為新思維建立品牌同形象,就連形容政黨嘅唔同長短字句都要度清度楚。
請公關相信已經使唔少錢,但原來新思維大把錢,阿Dick仲預計今年可籌到三百萬元添!因近期已密密同多個界別、持相同理念嘅人士會面,包括商界同無預計過會接觸嘅人士。新思維重頭戲就係明年一月嘅籌款晚會,由商界人士包場畀阿Dick筵開四十圍。