政壇：樹根工作報告勁搞「鬼」
呢排好多議員出工作報告。好似立法會議員鍾樹根就將名為「根你報告」嘅工作報告上載至社交網站，除咗報告名稱玩食字外，內頁連「妖魔鬼怪」都玩埋（圖），莫非配合萬聖節主題？報告將立法會「拉布」、港台興建新大樓、西九文娛藝術區同港鐵超支等議題，按「妖魔鬼怪」嚟命名，分別為佔中妖、拉布魔、大嘥鬼、燒錢怪同超支精，真係夠晒噱頭。
（互聯網圖片）
原來樹根為咗份工作報告，聘用咗星級設計公司，難怪喺設計上咁有諗頭啦！不過，今次並非佢首次聘用設計公司，早喺三年前宣布參選立法會選舉時，佢就請咗呢間設計公司為佢設計「升級」宣傳橫額，但被網民惡搞為豐胸「升cup」廣告添，唔知今次呢一份工作報告又會唔會出事呢？
