政壇：黃之鋒「唱衰之旅」 搵聯合航空開齋
話說學民思潮召集人黃之鋒前日啟程去美國紐約，準備出席當地人權組織舉辦有關佔領行動一周年嘅研討會。但佢未正式飛抵美國「唱衰香港」，就率先喺飛機上唱衰乘坐嘅美國聯合航空，投訴航班正餐少等。有網民就寸爆話，乜黃之鋒唔係曾喺佔領期間絕食逾一百小時咩？有「雙學」成員仲立即上載多張豐富美食嘅照片「贈興」。
黃之鋒
黃之鋒在社交網站投訴聯合航空航班正餐數量不足、小食又要額外收費。（互聯網圖片）
黃之鋒、外號「李漢奸」嘅白鴿黨創黨主席李柱銘同佔中發起人戴耀廷等，獲邀到美國出席由Freedom House舉辦嘅論壇，其中兩日行程仲同國家主席習近平訪美撞期，被外界形容為「唱衰中港」同「狙擊習近平」之旅。黃之鋒前晚喺Facebook自爆，話今次係首次乘坐長達十六小時直航機，但佢不滿聯合航空全程只提供兩餐膳食，小食要額外收費同簽卡，但佢冇帶信用卡，留言大叫「好肚餓」！
多名「雙學」成員見字後紛紛留言，但唔係對佢表示同情，而係自稱啱啱想去買糖水、食消夜等，有人仲上載多張美食照片，但其後已刪除。事件亦引起網民熱議，有網民指黃之鋒曾連續絕食逾一百小時，冇理由咁快就嗌肚餓；有網民就笑言乜黃之鋒唔係坐美國總統專機「空軍1號」嗎？有人更指這就是「雙學」等人夢寐以求嘅「國際標準」！
