政壇：岑敖暉驚冇得撈

而學民思潮召集人黃之鋒亦都話，佔領行動喺政制改革嘅訴求無法達到，稱唔上成功，又話自己即使冇案底，但因為積極參與社會運動，相信都唔會有前途。點知尋日又輪到學聯前副秘書長Lester岑敖暉接受訪問噏嘢，仲自稱罪名纏身添！

Lester接受咗一個網媒訪問，訪問中透露佔領行動之後喺外邊居住，每日都面對起居飲食、生活拮据嘅問題，又提到佢有次喺香港中文大學行落火車站，突然諗起前途，覺得依家自己罪名纏身，都唔知邊個會畀機會，又提到不如做小販，但係又擔心如果被警察驅離唔知點算。

Lester慨嘆，曾經嘅知名度同影響力對佢帶來極大嘅困擾，畀傳媒捧到一個位置，就乜嘢都唔能夠做到，令佢擔心日後唔知點樣發展喎。唔通Lester依家先驚佔領行動令佢前途盡毀？真係早知今日，又何必當初呢？

自言似有贖罪心態

對於佔領行動後，社會被撕裂分化，學聯亦都四分五裂，Lester就認衰，話自己依家嘅心態有啲似贖罪，因為公民社會喺佔領行動後所發生嘅事，同埋學聯之後面對嘅退聯潮，其實佢自己都有份造成，佢個人係要負上責任喎。

Lester同Alex、黃之鋒喺佔領行動期間就齊齊嗌咪抗爭聲大大，如果擔心將來冇得撈，或者可以學Lester話齋，約埋一齊做小販叫賣囉，橫掂都唔怕被執法人員檢控啦！