城中鏡：手機跌落電梯罅 單雞焗用國產
泛民主派議員成日都話驚電話畀人勾線偷聽，寧願畀多啲錢用外國製手提電話都唔用國產貨，但尋日白鴿黨嘅立法會議員「單雞」單仲偕出席活動時就被發現用國產樂視手提電話，唔通白鴿黨同中央官員食完一次飯之後，同中央關係已經修補，就算畀人偷聽都無有怕？
單仲偕（右）話老婆都曾經試過手機跌落電梯罅。
民主思路尋日舉行成立典禮，準備切燒豬之際，單雞先至姍姍來遲。問佢做乜遲到啦，佢就話係因為前日跌咗電話，叫大家體諒吓。佢話前晚出席完職工盟晚宴返屋企，入電梯時竟然一個唔留神，將部電話跌咗入電梯罅，呢幾日都會無電話用。
電梯罅咁窄，跌電話入去都算係萬中無一，單雞就否認係為咗換電話而故意跌入罅，仲對執番之後可以繼續用好有信心添！事關佢老婆一年之前都試過不慎將同廠手機跌入電梯罅，之後竟然奇迹地無穿無爛，相信今次都一樣。佢又話呢兩日惟有拎住國產手機頂檔，好快會回歸舊電話懷抱！
