名模Eunis陳嘉容尋日出席義工活動，並派發月餅畀獨居老人。佢喺活動上笑言怕自己將來會成為獨居老人，認為香港人應多花時間問候同關心老人。問佢係咪經常做義工？佢話：「都多，多數做關於小朋友同老人家。之前試過逐家逐戶派飯，有個婆婆係咁同我講佢後生嘅嘢，佢又冇小朋友，唔想畀我走。」咁將來會唔會生小朋友？佢話：「如果可以，我想生。愈多愈好，我媽咪生咗七個，過時過節好熱鬧，不過生小朋友都要隨緣。」

陳嘉容認為香港人應多花時間問候同關心老人。

再追問佢會唔會考慮「雪藏卵子」？佢坦言：「好多朋友叫我咁做，我考慮中。不過有啲朋友雪咗之後都冇用到，冇生小朋友，有啲就自然有咗，不過都當買個保險。」

提到早前佢被拍到同印籍機師前男友翻撻兼外出拍拖，問佢會唔會同男友一齊慶祝中秋時，佢明顯唔想多講，只係話中秋將同家人度過。喺記者再三追問下，佢先話：「我哋依家了解中，都睇緣分，如果有好消息一定會同大家講，我都想有好消息。」

第一手消息請下載on.cc東網iPhone/iPad/Android/Windows Phone Apps