城中鏡：葉劉再會麒麟
行政會議成員兼立法會議員葉劉淑儀今年農曆新年期間喺沙田車公廟被麒麟撞飛一幕可謂深入民心。有堪輿學家事後預測葉劉今年會好運滯，但佢一於唔信邪，早前答應出任客家功夫文化研究會嘅永遠榮譽會長嘅佢，尋日就出席該會嘅就職典禮與麒麟共舞，自言邊度跌低，就要喺邊度起番身咁話！
葉劉淑儀（左）應趙式慶邀請擔任客家功夫文化研究會的永遠榮譽會長。
原來梁福元（左）同劉業強都習過武，「食過夜粥」。
劉業強梁福元「食過夜粥」
研究會尋日舉行首屆委員就職禮，葉劉疑吸取咗上次教訓，今次就等麒麟喺表演完先至現身。上次誤打誤撞成為焦點嘅佢今次再成為活動主角，到場時仲獲麒麟到祠堂迎接。不過見佢步步為營，刻意同麒麟保持幾個身位，原來佢今次特地事先了解麒麟走位先。唔講唔知原來葉劉媽媽係客家人，今次唔係佢第一次食客家九大簋，不過難得有機會，佢都想學番幾招客家功夫。
同場仲有新界鄉議局主席劉業強同十八鄉鄉事委員會主席梁福元。佢哋話武術幾乎係新界人必學，以前用意保護條村，但好彩咁耐以嚟都冇需要真正使用。至於辦事處位於深井嘅荃灣區議員林琳就笑笑口話，該區有好多學武之人好照顧女士，故佢唔使識武功，出出入入都覺得安全！
日前李小龍一本武功秘笈以逾六十萬港元成交，會長趙式慶坦言冇類似收藏，佢話現時圖書館及網上四圍都有秘笈。同場嘅香港國術總會會長王嘉恩同副會長周國豐鍾情武俠小說，仲話多得當年讀書沉迷，中文水平先大有提升。
