麥潤培喺社交網站宣布與另外六名黨友一同退黨。（互聯網圖片）
喺政改方案被否決後，泛民政團因立場路線同選舉利益等問題，接連出現退黨潮。首先係公文袋有立法會議員湯家驊離巢，並另組智庫「民主思路」。之後白鴿黨繼立法會前議員黃成智被革除黨席後，另一同屬溫和派嘅元老狄志遠，早前亦正式退黨再另行組黨。就連黨友人數本來已唔多嘅地區政團新民主同盟，日前亦有沙田區議員容溟舟宣布退出。最新一次又輪番白鴿黨，而且一走就走七個，包括沙田區議員麥潤培等多名80後同90後「乳鴿」，唔知下次又輪到邊個泛民政團呢？
早前白鴿黨中委會否決麥潤培以該黨名義參選區議會，麥亦自行將各類宣傳品「去白鴿化」，大家已估計佢遲早會離巢。尋日佢喺社交網站上載咗佢封退黨信，指近日忙於地區工作同開拓網上平台，參與黨內工作時間已大減，為免影響黨務發展，惟有退出。
與麥潤培一同退黨嘅，仲有鄺智揚、鄺美娜、徐嘉輝、宋寶欣、李志宏及黃浩鋒等六隻「乳鴿」，全屬麥嘅好友或助手。白鴿黨回應指出，已收到有關退黨申請，中委會稍後會開會處理。
第一手消息請下載on.cc東網
