政壇：郭榮鏗又添丁 密謀追女
立法會法律界議員Dennis郭榮鏗已經有一個六歲大嘅囝囝，而尋日又添丁喇！佢仲急不及待咁喺社交網站公布喜訊同感謝太太，又上載咗一張抱住細仔、父愛爆燈嘅照片，真係甜到漏。Dennis話細仔出世有成七磅重，尋日朝早出世，太太已經為細仔改咗英文名叫Evan，至於中文名佢哋就仲未諗到。
郭榮鏗抱住啱啱出世嘅細仔，父愛爆燈。（互聯網圖片）
已經有兩個囝囝，會唔會想追番個女呢？Dennis話原本一心諗住兩個就夠晒數，但係依家見到BB咁得意，覺得都可以再諗吓喎。今屆立法會仲有兩位新婚但未做老竇嘅男議員，漁農界嘅何俊賢同勞工界嘅郭偉強，真係要加把勁呀！
