政壇：本土派入侵狙擊 學聯隨時遭瓦解

佔領行動期間「沒有大台，只有群眾」嘅口號曾響徹夏慤道，思潮一直蔓延，更引發接二連三嘅退聯行動。港大、理大、浸大同城大退出學聯後，退聯潮暫時平息，但城大學生會最近爆出倒閣事件，有學生收集到足夠簽名支持，由上星期四開始展開倒閣公投。

樹仁本土派學生會招莊

按會章規定，只要今個星期五之前有十分一全體學生、即一千七百人投票，而且贊成多於反對，親學聯嘅學生會就會被罷免。

據知，發動倒閣嘅學生有本土派組織嘅影子，但暫時未知佢哋推倒學生會之後會唔會自組內閣，令本土派喺學校嘅勢力壯大，但單係倒閣投票都已可反映學生之間唔再團結。

而仍係學聯成員嘅樹仁大學同樣面對本土派入侵學生會嘅憂慮。有人喺網上發放問卷，為樹仁本土派學生會招募莊員同義工，講到明以本土派身份參選學生會。如果本土派學生會真係成功當選，都唔難想像佢哋會喺樹仁發動退聯公投，到時學聯就好大機會再次分裂。

各大院校都即將面臨學生會換屆，到時唔單止本土派，相信其他不滿學聯嘅人，例如退聯關注組咁，都會出嚟競爭，以肅清學聯同所有學生會嘅聯繫。

話分兩頭，雖然話就話本土派強勢攻擊，但一切都皆因學聯失信於同學，先會搞到一年之間成員院校由八變四，潰不成軍。要保住學聯，作為秘書長嘅羅冠聰真係要攝高枕頭，諗諗點先可以挽回同學信任喇！