政壇：AV仁被寸爆得個名

話說中聯辦主任張曉明早前喺一個基本法研討會上，提出特首地位超然於三權之上，事隔一個星期，社會仍然議論紛紛。泛民立法會議員「AV仁」何俊仁就話「超然」、「三權之上」呢啲唔係法律字眼，可用唔同方式定義，亦可套入去個人睇法，唔可以亂用。

謝偉俊指坊間說法過簡

另一議員謝偉俊即刻寸AV仁，話正如佢係超級區議員，都唔代表佢係超級咁，係大家講吓之嘛，分明係打蛇隨棍上，嘲笑AV仁得個名！

喺尋日嘅《城市論壇》上，除咗AV仁同謝偉俊出席外，仲有工黨嘅議員何秀蘭同富貴黨嘅議員田北俊。謝偉俊就話「超然論」係敏感嘅議題，如果預知有爭議，中央官員、特首辦都應該之後做解釋，不過可惜無人咁做，社會如果對「超然地位」有清晰定義就唔會有咁大爭議，並指現時坊間的說法太過簡化、妄斷，有誤導成分。

AV仁就話「超然」唔係法律字眼，唔可以亂講，而特首依家唔受《防止賄賂條例》第三條規管，覺得唔同事實都反映特首有超然地位，佢認為現有制度對特首嘅制衡不足，只有直接選舉同民主選舉，特首就可以受選舉制衡。

田北俊亦即刻反駁話：「你反對咗個政改方案，畀五百萬人選咪無事囉，唉！」面對兩方夾擊，AV仁明顯無力招架，而隊友何秀蘭竟然唔幫手，AV仁惟有細細聲以「假嘅，假嘅」回應。

不過，何秀蘭似乎自身難保，有三個台下發言戴黑超嘅年輕人就點名批評，何秀蘭作為反對派、泛民會議召集人，竟然成立同中央溝通嘅四人小組，又質疑泛民一面話要消除功能組別，另一面又容許本身係功能組別嘅教育界葉建源做四人小組成員，認為泛民要制衡就唔可以講溝通。