東網電視
更多新聞短片新民黨已經三年無發表新政綱，尋日突然公布涵蓋土地房屋、教育同公務員等多個範疇嘅新政綱。雖然新民黨主席兼立法會議員、行政會議成員葉劉淑儀（葉劉）冇直接批評現屆政府，但全部建議都瞄準現屆政府仲未解決嘅民生問題，尤其係主「打」現屆政府重中之重嘅土地及房屋政策。葉劉表示，每個政府都有改進空間，今次只係針對最迫切嘅問題，但對參選下屆特首就不置可否。
葉劉避談鋪路選特首
葉劉建議成立獨立嘅土地發展局，解決熟地不足問題，又建議政府為青年人提供首次置業計劃，定價唔同市場掛鈎，並規定十年內不得轉讓。至於新界丁權問題，佢話依家預留發展丁屋土地只有約九百公頃，但係政府已積壓約一萬宗申請，根本唔知點「還債」，故應該處理呢個問題，又透露鄉議局都同意要解決丁權問題，鄉紳亦提議過容許興建多層丁屋等。
當大家多次提問發布政綱係咪要為參選下屆特首鋪路？葉劉都迴避無答，只稱三年來社會有好大變化，今次政綱希望為社會提供更多意見，亦樂意聽取各界聲音喎。
第一手消息請下載on.cc東網
