政壇：AO歌王靠打天才波
仁愛堂日前舉辦每年一度嘅名人名曲慈善演唱會，主席史顏景蓮（Kimmy）今年請咗早前開過個人演唱會嘅民政事務局前常任秘書長「AO歌王」楊立門一齊合唱。楊立門太太話，老公退咗休之後成日都要演出，仲忙過喺政府時，好在老公多數打天才波，甚少喺屋企練習，佢先唔使被迫日日聽演唱會咋！
史顏景蓮（右）邀楊立門（左）合唱，為認知障礙症患者籌款。
陳明耀（中）打扮趣怪，好友吳宏斌（右）同鍾志平都好感興趣。
Kimmy就話，今次活動主題係「愛常在」，由於長者數目不斷增加，「認知障礙症」將會成為最受關注嘅疾病之一，佢哋會提供半價至免費嘅相關訓練活動同預防資訊畀相關人士。講到認知障礙，退休一族被認為腦忽然真空，容易退化，啱啱退休一年嘅懲教署前署長單日堅就話，佢肯定冇呢個問題喇，事關佢積咗一大堆旅行目標，繼早前首次去完台灣環島遊後，最近又同太太去咗波蘭奧斯威辛集中營，令佢感受極深。佢話覺得東歐治安還好，但建築物顏色相對單調，同俄羅斯色彩繽紛嘅建築物對比甚大。
