政壇：搞搞政：謝偉俊謀主席位 怨建制派大蝦細
建制派內部就立法會各事務委員會嘅正副主席之爭，一波未平一波又起，以司法及法律事務委員會主席為例，本身係大律師嘅中總代表廖長江同都係大律師嘅議員梁美芬仲未傾掂數，但法律界出身嘅議員謝偉俊（Paul）又話有意競逐。阿Paul尋日明言，做副主席就如花瓶，根本無意思，佢仲不點名批評某啲建制派大黨忽略別人感受，似乎好大怨氣噃。
阿Paul話，自己過去幾年從未做過主席，反觀部分建制派議員做第一屆立法會議員就已經做主席，佢自嘲可能同自己過往無乜點出聲、無政黨同唔識玩嘢有關。問到會否覺得某啲政黨太霸道，阿Paul話唔會用霸道形容，但就暗批某啲大黨忽略佢嘅感受，因佢已唔止一次講過想做委員會主席。
至於點解想做司法委員會主席，阿Paul就話法律係佢老本行，不過除咗呢個委員會，佢對經濟、政制、保安等事務委員會都感興趣。佢又話，大家不妨參考吓英國、德國等優質民主國家，人哋唔會出現大黨蝦細黨嘅情況。佢仲忽發奇想，建議畀社民連議員梁國雄做主席，「可以試吓畀啲頑皮學生做班長」。
