政壇：貪曾 佔中黑手 疑恃外國勢力撐腰 蒲頭寸政府

「戴」罪身出口術怕被炒魷

過去一段時間甚少現身嘅貪曾，最近忽然活躍起來，繼月初赴京參加閱兵儀式，早前出席酒會時仲厚顏上台，同多名特區高官及工商界人士祝酒碰杯，當畀記者問到三個月檢控期限將至，會否擔心快將「落鑊」時，佢竟然嘻皮笑臉拋低一句：「你真係好好笑！」貪曾前晚又被發現盛裝出席教堂望彌撒，如此「招積」同招搖過市，莫非佢已預知會不被檢控？抑或律政司受壓力不敢起訴？

至於沉寂一時嘅佔中三子，近期亦輪流接受電台訪問，喺佔領後期幾近銷聲匿迹嘅戴耀廷同陳健民，試圖將失敗責任推卸畀學生。戴耀廷除咗指最遺憾係未能提早結束佔領，又指自己一旦被檢控定罪，佢任教嘅港大對佢處分必定再惹起另一場爭議，變相威脅校方不要「炒」佢。至於另一發起人朱耀明，尋日亦現身接受電台訪問，透露佔領行動後多次出入醫院，身體較弱，仲做咗兩次眼部手術，但聲言有做鍛煉，已做好坐監嘅準備。

陳日君承認自己「逍遙法外」

另一方面，有關肥佬黎向泛民主派人士同團體秘密捐款醜聞，揭發多時兼證據確鑿，但調查至今仍無下文，被視為佔領最大金主嘅肥佬黎，竟大言不慚聲言不怕坐監，只係怕洗廁所。天主教香港教區前主教陳日君早前更公開承認自己「逍遙法外」，反問「在法律面前不是人人平等嗎？」表現得等拉等到不耐煩。此外，曾自稱願意「日日做漢奸」嘅民主黨創黨主席李柱銘，今年三月到灣仔警察總部「預約拘捕」，至今仲未有任何檢控決定。

肥佬黎「只怕洗廁所」 疑暗示輕判

此外，參與違法佔領嘅「雙學」學聯同學民思潮，警方月初只向學民思潮召集人黃之鋒、學聯現任秘書長羅冠聰同前秘書長周永康等提出起訴，等同只檢控「卒仔」「蝦兵」，而一眾佔領幕後黑手、金主、「貪盡海陸空、歎盡省港澳」嘅貪曾則逍遙法外，難怪有人質疑佢哋有外國勢力撐腰、後台夠硬，故睇死執法部門唔敢起訴佢哋，即使被檢控，亦預期會係輕判，甚至暗示刑罰輕到「洗廁所」了事，原來「司法獨立」就是這麼一回事。