城中鏡：企業家顯才藝
尋日下晝喺貨車川流不息嘅葵涌工業區出現近百名西裝友，齊齊參加中華廠商聯合會喺一棟活化工廈地下舉行嘅「企業家的藝術世界」展覽開幕式。參展嘅多數係廠商會中人，包括永遠名譽會長楊孫西、常董司徒健，仲有鍾意影靚女相嘅永遠名譽會長尹德勝。同樣係攝影發燒友嘅廠商會會長Eddy李秀恒笑笑口話，以前會同尹德勝一齊去影相，但係做咗會長之後好忙，惟有暫時放低相機先喎。
李秀恒（右）好欣賞身後尹德勝影嘅《半邊美女》。
周彩紅（左）同冼婁文英密斟，希望在婦委會開辦繪畫培訓班。
楊志雄（左）捧住司徒健創作嘅三隻豬仔，愛不釋手。
副會長Johnny楊志雄一見到身兼賽馬會鯉魚門創意館香港陶藝工作室總監司徒健嘅三隻豬仔陶藝作品，如獲至寶，事關佢間耳機公司有位高層生肖屬豬，最喜歡蒐羅豬仔擺設。Johnny笑稱，呢幾隻豬仔獨一無二，夠晒特別，送畀呢位高層一定好鍾意。Johnny咁有員工心，認真唔話得。
周彩紅盼開培訓班
廠商會青委成員Rainbow周彩紅都展出色彩繽紛嘅畫作，佢係業餘畫家，亦創辦一間社企教單親基層媽媽畫畫同做手工藝，令佢哋閒餘可以做啲藝術創作，由社企喺網上出售幫補家計。Rainbow一見到廠商會婦女委員會名譽主席冼婁文英就密密傾，希望可以喺婦委會開班，培訓多啲人去做導師就好嘞！
借出場地嘅Eddy見到咁多老友嚟捧場，認真開心。佢話喺工業區搞藝術展覽，係想話畀大家知，工業區除咗沙塵滾滾之外，亦可以好藝術。
