政壇：金融心臟保安嚴 陳德霖話似「渠務部」

今年係香港銀行同業結算公司成立二十周年，佢哋嘅數據中心亦係第一次開放畀傳媒參觀。金管局總裁「攞命陳」陳德霖就用「渠務部」嚟形容嗰度嘅同事，即係好似大廈水管，支持日常運作，平時睇唔到佢哋，留意到佢哋時，通常都係出事嘅時候啦。

參觀呢個「渠務部」前，手袋及電話一概畀人收起晒，影相錄音通通No。入去主機房同伺服器前，更加要經過兩道保安門，第一道門關好，先可以打開下一道門。保安嚴密程度，同香港印鈔公司絕對有得揮。

主機房有齊專人全年三百六十五日二十四小時不間斷監察運作，而且保持攝氏二十二度同百分之五十濕度，雙重煙霧系統同供電，兼有防水感應，加埋後備電源同自動發電機，同銀行間聯繫亦以專線處理；所以近三年打風落雨都能夠保持100%運作。而且佢哋其實有兩個數據中心，仲係即時同步備份，點都唔驚斷線。

呢個香港金融活動嘅心臟究竟收喺邊？你估吓。