政壇：搞搞政：揀錯廢鑊籮底爛橙 金刀梁無眼光被叮
日前政府宣布成立遴選委員會，為下任平等機會委員會主席展開公開招聘，意味任內劣迹斑斑、醜聞不絕嘅現任主席「周一鑊」周一嶽，九成九會喺明年約滿後被叮走。咁到底當年係邊個無帶眼識人，向政府推薦「翻閹」「廢鑊」周一嶽呢？原來正係近期因副校長任命風波而搞到一身蟻嘅香港大學校務委員會主席「金刀梁」梁智鴻。
金刀梁雖然醫術高明，但眼光就認真麻麻，揀完隻「廢鑊」，又揀埋「爛橙」，引薦港大法律學院前院長陳文敏升任副校長，搞到港大以至全香港都滿城風雨，爭議不斷。政府喺今次平機會遴選程序中叮走金刀梁，算係近年罕見嘅明智之舉。
平機會第五任主席鄧爾邦，任期尾段被揭行政混亂同大花筒醜聞，政府於是首次為揀選主席成立遴選委員會。當年嘅委員會主席為深受「貪曾」前特首曾蔭權爵士器重嘅金刀梁，其餘兩名非官方委員為行政會議成員陳智思同當時未做運輸及房屋局局長嘅張炳良。結果委員會推薦咗前高官林煥光接掌平機會，但林做唔夠幾年就轉咗做行會召集人，令政府要再成立遴選委員會搵接班人。
推薦周一嶽惹爭議
第二屆遴選委員會又搵咗金刀梁做主席，非官方委員有兩名行會成員史美倫同周松崗，以及視障人士曾建平，結果推薦出同金刀梁同屬外科醫生、兼且喺醫管局共事過嘅前高官周一鑊，引起各界嘩然，質疑梁不避嫌明益老友，並導致平機會再次進入黑暗時代。
睇番今次第三屆遴選委員會嘅組成，主席史美倫，非官方委員周松崗、陳智思同曾建平都係舊人，扣除已做官嘅張炳良，就唯獨欠咗金刀梁一個，原因相信唔使畫公仔畫出腸嘞！歷史印證金刀梁次次揀錯人，千揀萬揀，唔係廢鑊就係籮底爛橙，金刀梁變咗「銹刀梁」，相信決定叮走佢都係經過深思熟慮，希望唔好再添煩添亂嘞！
