政壇：立會爭位 建制內訌
話說建制派早前已揚言要向泛民主派報復，要包攬立法會各委員會的正副主席位，但未搶到位，建制派內部就懷疑「分贓唔勻」而內訌。工聯會投訴建仔想搶走房屋事務委員會主席個位，仲分分鐘唔會還返第二個主席位給工聯會。不過，建仔就反駁，呢個位之前係泛民坐開嘅，按道理建制派可以輪流擔任。建制派將喺下月初開會講數，並作最後決定，屆時分分鐘嗌交及吵大鑊。
今次爭位係源於舊年泛民「突襲」搶走工務小組同人事編制兩個小組委員會嘅正副主席，之後建制派議員申請逾期加入委員會亦屢遭阻撓，觸發建制派誓要喺十月新一年立法會期搶位報復。據了解，幾年前協調好由泛民做主席嘅委員會，依家就有唔少建制派虎視眈眈，例如房屋事務委員會，現時由工聯會麥美娟做主席，建仔嘅鍾樹根做副主席，但近日就傳出建仔希望一人做一年主席，新一年應該由鍾樹根接任主席，結果引起工聯會不滿，揚言如果建仔硬要搶位，建制派要讓出交通事務委員會主席之位畀工聯會鄧家彪擔任。
選票有關爭崩頭
本來協調由工黨李卓人做主席嘅公務員及資助機構員工事務委員會，建制派就屬意由勞聯嘅勞工界議員潘兆平繼續做主席，但同時建仔亦有意派郭偉強爭奪主席之位。以上幾個主席位都涉及公屋、民生同基層公務員嘅權益，同選票有極大關係，自然爭崩頭。至於一啲同選票冇太大關係嘅委員會，爭拗亦唔大，預計教育事務委員會主席係工業界林大輝、資訊科技及廣播事務委員會主席係建仔嘅葛珮帆同司法及法律事務委員會主席係商界廖長江。
工務及人事編制兩個小組委員會，建制派就決心要喺泛民手上搶番嚟，預計會由盧偉國做工務小組主席，馬逢國做人事編制小組主席。而內務委員會同財務委員會正副主席人選，現時未有定案。消息指，如果保險界陳健波要做其中一個位，佢做開嘅財經事務委員會主席之位，預計會由金融界吳亮星或金融服務界張華峰接任。
