西環：違泊滿街 警方懶執法
「原本雙線行車，但成日有車違泊，條路好多巴士、貨車呢啲大車行，好驚遲早會撞車！啲車仲會泊埋上行人路，真係阻車又阻人！」西環居民曹小姐指皇后大道西違泊嚴重，惟鮮見有警員巡邏及執法，不滿違泊影響道路暢通，更對駕駛者及行人構成不便及危險。
皇后大道西常有車輛違泊馬路及行人路，被指對駕駛者及行人構成不便及危險。
警方發言人表示，接獲本報轉介後，隨即派員到場視察，惟未有發現所述情況。而根據紀錄，過去一年未有接獲相關投訴，但曾向上址附近一帶的違泊司機和車輛發出四次口頭警告和二十一張定額罰款告票。「情況都冇好到，日日落街都好似之前咁泊滿車！」曹小姐促警方加強巡邏外，亦建議警方檢討現行打擊違泊措施。
