泛民主派內部分崩離析，但對外就成日想營造團結嘅假象。尋日，泛民飯盒會正名為泛民會議，公民黨前黨員湯家驊本來去匯報月初喺北京與港澳辦副主任馮巍會面內容，沒料到一入會議室，就被公文袋黨魁兼飯盒會召集人梁家傑以「議程未到」請離場，令湯即時反問「即係唔當我係泛民啫」？最後要由白鴿黨議員何俊仁出面邀請湯返入會議室。梁家傑雖然事後認衰，但佢忽然變臉呢招，真係夠無情！

梁家傑事後承認安排不周，又辯稱，無講清楚幾時叫湯入房。其實，如果佢哋真係有當湯係泛民一員，又點會要「安排」先入到會議室開會呢？

狄志遠退出白鴿黨

泛民溫和派被孤立、被割裂已經唔係新鮮事，尋日正籌組溫和泛民政黨嘅白鴿黨狄志遠正式去信該黨，宣布退黨，雖然狄志遠好感性話，要同三十年朋友說再見是有不捨，今日離開白鴿黨，並非大家已失去理想或理想不同，而是「在實踐理想的策略上，手法上有分歧」，而且受到外間壓力，變得沒有容許、容忍、容納不同意見的空間，對此感到難過。不過，狄都透露，「有黨友私下或公開請我離開民主黨」，慨嘆當年八號風球在新華社外抗議，分不出雨水定淚水，「就咁講再見，容易嗎？」他對退黨有遺憾，但不會有恨，將來在民主路上「見面亦是朋友」。

不過，白鴿黨主席劉慧卿極速在兩個鐘後，已稱中委會WhatsApp群組有六成人接納狄志遠退黨，並祝佢好運。呢啲算唔算君子分手不出惡言？或者更似排除異己啦。

第一手消息請下載on.cc東網iPhone/iPad/Android/Windows Phone Apps