政壇：李祿蠱惑「撈底」 盡得股神精髓
講起被喻為「股神接班人」嘅李祿，大家除咗知道佢係當年六四事件嘅學生領袖之一，仲有佢深得巴菲特嘅投資精髓。上月，李祿原來趁市低大手增持中車股權，之後喺美國寄信嚟港交所申報，但遲咗成半個月，佢呢個「撈底」同「走灰色地帶」嘅做法，被指似足巴菲特○七年沽中石油嘅申報手法。
李祿早前低價買入中車，但申報卻較交易慢咗半個月咁多。（資料圖片）
港交所發言人證實，李祿嘅申報文件喺美國寄出，以掛號信形式喺本周二寄抵港交所，港交所已經即時處理仲尋日上網。呢個股權變動披露方式漏洞問題，聽講證監會「正在處理中」喎。
港交所資料顯示，李祿管理嘅對沖基金喜馬拉雅資本，八月二十四日喺場內買入2323.6萬股中車，平均每股8.519元，涉資達1.979億元，持股由過去「暗手」嘅4.83%，增至5.36%嘅須披露水平。到尋日真正「披露」到出嚟畀公眾對眼睇到，已經爭咗十七日！尋日，中車尾市突然抽高，收報9.2元，李祿帳面勁賺8%，賺成1,582萬元，而且消息未來有可能再刺激中車股價添。
講番大市波動，巴菲特原來無有驚，仲話歡迎個市跌，事關咁先有機平入佢心儀愛股。佢仲話，個市有時Chok到依家咁，亦有時悶到想瞓，但記住重點係睇長啲線，幾長？五至十年咁啦。
