政壇：囡囡想做記者 吳永康幫收風
好爸爸有乜嘢要求？或者可以參考吓碧瑤主席吳永康（Ben），佢個女得十六歲大，但佢聽到囡囡大個想做記者，尋日同傳媒飯敍時，阿Ben一坐低就發問，譬如突發記者做啲咩？點輪更？返工時間有幾長？一輪嘴真係好熱衷了解傳媒行業。
吳永康為咗囡囡嘅記者夢搜集資料。
原來呢個廿四孝阿爸係幫囡囡收風，事關阿Ben有個十六歲嘅囡囡，雖然出年先考DSE文憑試，連大學都未讀，但小妮子已經有清晰目標，將來想入新聞界咁話，仲想做戰地記者添！去敍利亞。
阿Ben一聽囡囡呢個宏願，當堂嘅反應係「唔係啩」。不過，雖然好擔心，佢都依然抓緊機會，為囡囡搜集定資料。或者囡囡有大志，爸爸恨都恨唔到。只不過，如果係戰地記者，佢攞突發記者嘅資料未必有用喎。
