政壇：張宇人籠裏雞作反
立法會泛民同建制政黨關係惡劣，新一個立法會期下月揭幕，十幾個委員會正副主席又有新一輪音樂椅遊戲，泛民主派上年喺人力及工務小組偷襲，搞到議會拉布愈趨嚴重。為報復泛民，建制派計劃新會期中以人海戰術，包攬各大委員會正副主席。點知自由黨嘅張宇人日前忽然開聲，有意競逐內會主席個位，呢一着被視籠裏雞作反，更令建制派辛苦砌定嘅平衡局面亂晒龍，分分鐘委員會正副主席大戰再甩轆都似。
建制派之前已協調新一個立法會會期嘅正副主席安排，內會主席即經民聯梁君彥維持不變，其他比較重要嘅委員會主席人選亦有磋商過，點知棋局初定，張宇人日前忽然瞄準內會主席一職，欲正面硬撼梁君彥，事件搞到建制中人好錯愕，梁君彥更拒絕回應。據聞張宇人忽然「搶位」，是因為不滿建制派霸道，不准他繼續擔任財務委員會主席一職，同時要展示實力，實行一拍兩散。
年紀大想試新崗位
張宇人話，佢其實有呢個想法成年，但承諾做財會主席一年，便依約行事，今年係在「年紀老邁、時日無多之下，欲嘗試吓新崗位」。佢又話，二○一二年確有建制派大佬諮詢該黨榮譽主席田北俊做不做內會主席，但冇諮詢張宇人會唔會做，直言「當中可能存有少少誤會」。而且，做唔做得係要睇建制同泛民嘅同事畀唔畀機會佢喎。
點都好，內會主席一職慣常四年任期內不會換人，今次自由黨忽然另外「出牌」爭位，擺明係建制派「籠裏雞」作反，連帶原本已經執咗籌做個別委員會主席嘅陳健波都被蹺起晒。最弊嘅係，如果自由黨五票同泛民二十七票結盟，建制派包攬全部委員會正副主席嘅希望一定落空，睇嚟建制派原來嘅攻陣圖勢要重新砌過至得。
