城中鏡：水中暢詠
經過日前試水後，合格嘅健兒就會參加下月舉行嘅維港泳，主辦機構近日邀請咗唔同界別人士，拍攝一系列水底照為參賽者打氣，原來除咗現年九十一歲嘅詠春拳宗師葉問之子葉準同香港首位職業西洋拳拳擊手「神奇小子」曹星如外，剛退休嘅香港鮮魚行學校前校長梁紀昌及該校學生都被拉落水。班小學生穿上泳衣上場，唯獨梁紀昌着恤衫打領呔，同啲學生相映成趣。
梁紀昌（左二）同三名鮮魚行學校學生喺水中拍照為維港泳健兒打氣。（受訪者提供）
葉準喺水中大耍木人樁法，水花四濺。（受訪者提供）
楊雲濤話喺水底企都企唔穩，感覺特別奇妙。（受訪者提供）
水底企唔穩 楊雲濤歎奇妙
當日梁紀昌聯同三位鮮魚行學校學生一齊參與水中拍攝，佢話自己喺一九七八年渡海泳停辦前曾參與過賽事，今次有份參與拍攝水底照，笑言好似海龍王，有啲學生好似蝦兵蟹將咁喺旁邊陪佢玩；又指水中拍攝最難係「小朋友成日浮來浮去，好難控制」，但就話過程十分開心有趣。
葉準同曹星如亦有參與拍照，葉準師傅透露，佢已經有大約三、四年冇游泳，今次係首次喺水中拍攝，當日佢喺水中大耍木人樁法，現場水花四濺，玩得不亦樂乎！而早前獲得職業生涯中十八連勝嘅曹星如原來唔識游泳，首次喺水中不斷出拳嘅佢話感覺相當新鮮，雖然要喺水中閉氣感到有啲辛苦，但仍十分享受拍攝過程。
打機達人搖身一變成為廣告天王嘅「達哥」林慧韡、香港舞蹈團藝術總監楊雲濤等亦都被拉落水。對於第一次挑戰水底舞台，楊雲濤就話多年嚟跳舞都係站喺舞台上面，而喺水底舞台企都企唔穩，感覺特別奇妙。
