政壇：搞搞政：反水客砸零售飯碗 本土派倒米難爭選票
激進本土派今年初發起連串光復行動，令訪港內地旅客數目銳減。事隔半年後，光復上水反水貨客行動死灰復燃，有本土派事後否認同十一月區議會選舉臨近趁機宣傳有關。但據聞至少四名激進或以反水客行動起家嘅本土派人士密謀參選。然而，激進本土派打正旗號打爛零售業飯碗嘅「倒米」行為，係咪都可爭到選票？實在匪夷所思！
「本土民主前線」發言人黃台仰喺剛過去嘅周日亦有參加光復上水行動，事後被警方拘捕。地區消息指佢同另一名成員早前輪流喺土瓜灣一帶現身叫咪，有傳佢會親自參與九龍城土瓜灣北選區，挑戰立法會議員、當區區議員李慧琼。據悉一切只係煙幕，真正積極考慮參選係另一名發言人、港大哲學系學生梁天琦，相信係靠黃台仰知名度參選。
金金大師自認唔受歡迎
同樣喺地區試水溫嘅有外號「金金大師」、北區水貨客關注組發言人梁金成，佢喺社交網站多次上載喺上水港鐵站附近天橋派發單張嘅相片，據聞佢擬與北區區議會主席蘇西智喺彩園選區一較高下，然而梁金成接受查詢時承認，市民對佢嘅反應一般，轉口風指要考慮係咪喺該區參選，或轉到其他地方參選，真係未出戰已「認低威」。
此外，曾就無證兒童「懷仔」發起連串示威嘅「香港本土力量」，其兩名成員冼偉賢同何志光最近亦「轉型」落區。據本土力量Facebook顯示，冼偉賢一度到觀塘翠屏邨入屋抽驗水辦，而何志光則先後喺秀茂坪寶達、黃大仙等地點擺設街站。
面對激進本土派「空降」落區，有建制派區議員似乎未驚過，更反客為主主動「叫陣」，表明歡迎本土力量中人隨時前來挑機，因為初步評估，唔見得選民會支持激進或任何「倒米」行動，似乎完全沒有將激進本土派放在眼內。
