政壇：和美低調招股 驚散戶反應太好

William有解釋，因為機構投資者認購多，如果散戶反應好，可能會分薄國際配售配額。結果，公眾認購只係超購七倍幾，唔使回撥畀公開認購，佢哋反而幾開心喎。

「陽光化」管理唔畀收利是

William話內地一般醫生係五千人仔月薪，因為唔多夠，所以收好多灰色收入幫補，包括收病人利是同藥廠回佣。不過，佢哋和美係行「陽光化」管理，唔畀員工收利是，而佢哋醫生嘅月薪亦有二、三萬蚊人仔。

但習慣即係習慣，有啲準媽咪硬係唔放心，係都要畀利是醫生。William話佢哋啲醫生會退番畀個客，如果個客人硬係唔肯收番，利是就會直接計落收費單度。

內地興自然分娩定開刀？William話一半半。自然分娩一般包三日住宿就五萬人仔，開刀包五日住宿就貴多兩萬。不過，佢哋寧願賺少啲，都鼓勵啲準媽媽盡量自然分娩。