政壇：政圈後輩爭做傻豬
話說立法會議員劉慧卿（卿姐）喺周日出席港台節目《城市論壇》時，一句「傻仔」回應新壇主蘇敬恆，事後惹嚟政圈一片抽水潮，個個排住隊認係卿姐口中嘅「傻仔」。卿姐尋日講番件事，佢話唔記得幾時開始有講呢句口頭禪，但講咗咁耐，大家都冇乜意見，可能今次喺電視機面前講，先令網民有所反應。至於將來會唔會收番呢句口頭禪，卿姐話人哋唔鍾意就唔講喎。
咁有邊啲人被卿姐叫過「傻仔」呢？卿姐話其中一個係佢讀倫敦政治經濟學院嘅師弟、離島區議員周浩鼎。仲記得卿姐當日向蘇敬恆致歉時，話平日都會用嚟稱呼自己啲黨友，強調當時佢並無惡意嘅，講完冇耐，佢班黨友事後陸續認頭爭住做「傻仔」。
梁繼昌冇熄燈認「衰仔」
原來卿姐同班黨友講嘢時，唔止淨係講「傻仔」，仲有「傻豬」添！黨友尹兆堅話，卿姐都試過叫佢「傻仔」，又試過開會時當住咁多人面前話「唔係呀嘛，傻豬」、「離晒譜」呢啲口頭禪，但佢認為講呢啲說話係睇語境，並唔係侮辱對方。
就連立法會嘅同僚，會計界議員Kenneth梁繼昌都話，卿姐成日都叫佢同資訊科技界議員莫乃光同法律界議員郭榮鏗做「細佬」或「衰仔」，尤其喺做議員頭一、兩年。吓！點解話佢哋係「衰仔」？咪緊張，Kenneth話係因為佢哋唔記得熄座枱燈就走人。佢都話呢件事抵鬧，因為浪費能源，而畀卿姐鬧完，事後佢哋都會乖乖哋熄燈，咁就唔使卿姐勞氣喇！
