城中鏡：馮英倫 賭城蜜月嗒佳釀
話說發展局局長政治助理Allen馮英倫喺六月底結咗婚，但係拖到依家九月頭，先放到半個月假去美國賭城拉斯維加斯度蜜月。不過，Allen上載到facebook嘅相，見馮太Carrie化咗超淡妝，上鏡都幾清秀，睇落又幾開心，斷估冇嬲Allen拖咁耐唔度蜜月啩？
馮英倫夫婦去拉斯維加斯補度蜜月。（互聯網圖片）
Carrie係澳門人，從事紅酒生意，今次去度蜜月，順便試吓啲靚紅酒。Allen喺太太影響之下，都有品酒。咦，兩公婆酒量都好好？Allen就話品酒唔係猛飲，有啲人試完酒，仲會吐番出嚟。睇嚟Allen娶到個識飲嘅太太，應該學到唔少葡萄酒嘅知識嘞。
