城中鏡：零售業諗計過寒冬

李鋈麟話：「以前有一車車旅客去買手錶、珠寶或去藥房，依家全部都冇晒！」佢估計整體零售生意少咗約七成，擔心明年農曆新年前，會有倒閉潮，最少一、兩成舖頭會執笠，依家都未知「寒冬」幾時完。佢認為政府應該多啲向內地宣傳會對反水貨客嚴厲執法，以及旅遊熱點已冇晒反水貨行動，令旅客有番信心再嚟玩。

人仔貶值　危中有機

至於裕華國貨董事總經理余鵬春就話，除咗內地客少咗，股災都令旗下生意受影響，好彩受惠於人民幣貶值，依家入貨都平咗，希望過兩、三個月市況會穩定啲。另外，政圈一直傳余鵬春有意競逐總商會立法會代表林健鋒個議席，今次再問佢就大笑話：「到時就知囉，到時就知，如果公布咪即刻計我啲選舉經費。」

做開有機護膚品生意嘅博愛醫院副主席Lily陳李妮就比較好彩，佢話做開熟客同港人生意，加上控制成本，得閒又醒啲護膚小貼士畀客，所以影響唔大。Lily仲話早前想換過間村屋畀媽媽住，咁啱佢大約八年前喺馬鞍山買入嘅一個過千呎單位有人買咗，足足賺咗一倍，孝順女果然有福喎。