政壇：搞搞政：選舉處警方 宣傳短訊被當電騙

尋日不約而同有市民係網上討論區留言，話收到一個以GovHK REOvr（選舉事務處）名義發出嘅電話短訊，短訊中提供一個網頁連結，要求佢登入選舉事務處網頁查閱選民登記資料，覺得成件事好可疑，都唔知係咪想套取個人資料。選舉事務處尋日就發稿澄清，指當局根據選民提交的資料，為四十萬名已登記選民更新登記資料，市民可以利用網上查閱系統，或致電選舉事務處核實最新嘅資料，若發現任何問題，可在下周四前致電提出，而正式選民登記冊會喺本個月二十五日公布。

首跨界別合作

此外，亦有市民收到嚟自警方嘅電話短訊，呼籲市民提防電話騙案，如接獲任何自稱執法或其他機構人員之來電，要求交出金錢或個人及銀行資料，唔好輕易相信。懷疑自己受騙時，就要立刻同警方聯絡。過去警方從未試過用短訊方式向廣大市民發送訊息，市民收到訊息時自然有所懷疑。

警方發言人話當局高度關注電話騙案，並透過跨界別及機構嘅合作模式，作全方位宣傳防騙教育，以提高市民對電話騙案嘅防罪意識同警覺性。佢哋最近就同流動電訊服務供應商合作，向市民發放預防電話騙案嘅提示短訊，務求將防騙訊息更直接同廣泛地傳遞至所有市民。其實政府部門向市民發放訊息前，係咪應該先發新聞稿向公眾講解有關新安排呢？相信會減少市民誤會嘅機會。