新一屆區議會選舉喺十一月下旬舉行，除咗泛民主派同傘兵撞區之外，建制派之間亦未能完全協調，一唔小心隨時益咗對手。早前富貴黨為咗還擊新民黨派人去東區北角丹拿選區搶位，隨即派人去東區太古城東選區服務，疑似挑戰新民黨嘅現任議員謝子祺，為選情增添唔少變數。不過，聽聞富貴黨並唔係謝子祺嘅真正對手，反而港大學生會前會長兼港大校友關注組副召集人王振星先係勁敵。結果係點？真係要拭目以待嘞！

謝子祺腹背受敵

港大副校長遴選風波沒完沒了，但造就咗港大校友關注組聲名大噪，唔知會唔會因為咁幫咗有意參選太古城東選區嘅王振星呢？本身係工程師嘅王振星，九七年擔任港大學生會會長，仲有份將「國殤之柱」由維園運去港大，立場明顯傾向泛民。沉寂多年嘅佢，早前成立咗太古社區工程，積極擴展社區網絡，到最近喺港大校友關注組中擔任副召集人，嚟緊將會喺太古城東硬撼謝子祺。

王振星除咗擁有專業背景，再加埋勤力落區，已對謝子祺造成好大威脅，若再加上富貴黨派出青年團內務執委黎亮加入戰團，隨時分薄謝子祺票源，或會令王振星坐收漁人之利。不過有分析指出，雖然謝子祺今屆勝出，但太古城本身係中產區，有唔少選民都傾向支持泛民，由一二年立法會選舉中可見，當年公文袋喺嗰區以二千三百多票贏咗得一千一百多票嘅新民黨，票數相差一倍有多，所以謝子祺都有啲危機。

老實講，區議員係政黨啲地區樁腳，好影響明年立法會選舉嘅形勢，睇怕新民黨主席兼立法會議員葉劉淑儀都會(目及)實區選。再講，區議會選舉始終講求勤力做地區工作，政治立場反而係其次，太古城東最終鹿死誰手，真係要到最後先知喇！

第一手消息請下載on.cc東網iPhone/iPad/Android/Windows Phone Apps