政壇：搞搞政：錢大康掌浸大 遠離港大風波
浸會大學新任校長錢大康尋日都喺開學日正式履新，見到佢，大家好自然聯想起佢之前係香港大學首席副校長，近日港大副校長（學術人事及資源）遴選風波搞到滿城風雨，想問吓佢有咩意見啦！點知佢就話自己第一日返新工，唔想談論其他院校嘅事。咁佢覺得港大學生、校友嘅做法有無干預院校自主，錢校長都只係話呢度係浸大，港大喺薄扶林，要問就問番港大喎。佢句句都拎浸大做擋箭牌，真係「港大遠離我」囉！
其實，唔少院校學生都有聲音要求修改由特首出任校監嘅做法，錢大康亦曾經話呢個做法過時，上任後若社會認同要檢討，佢會同其他院校討論。不過，佢尋日被問到呢個問題時，口風就改咗，話呢件係高教界嘅事，應該聽多啲嘅意見，佢就無乜意見喎。
大學校長喺政治立場亦好受外界關注，被問及日後會唔會做政協、人大代表時，錢大康就話自己唔屬於任何政治、政黨，仲話做校長期間，唔會參加任何非學術、非教育、非科技等公職。佢仲話，自己好似中小學生開學咁緊張同興奮，未來會同師生加強溝通喎。
