把握時間同機會，係唔少成功者嘅秘訣，尋日金嗓子舉行上市後首個業績記者會，佢哋董事長江佩珍精神奕奕好似開學咁，佢喺業績會上大談公司業務，認為人民幣貶值對佢哋嘅業務冇乜影響，因為兌外幣仲有利銷售，講到口乾，被譽為「江老娘」嘅佢即席食粒喉糖，仲叫台下記者唔好客氣，一齊食，佢嗒自家糖之餘，仲立即轉台用好純正嘅廣東話講：「喉嚨痛？食金嗓子啦！」業績會都可以變為廣告發布會，真係識得把握時機喎。

江佩珍

「江老娘」心情靚靚，事關今年交到一盤靚數，公司嘅收入達到三點四八億元人民幣，按年增加咗兩成，梗係風騷啦。

講完業績，江老娘又祝願到會者身體健康、工作順利、男嘅靚仔、女嘅靚女，大家行好運咁話！嘩，雖然過年有排未到，但江老娘就好話唔怕多，畀人好多歡樂。

第一手消息請下載on.cc東網iPhone/iPad/Android/Windows Phone Apps