政壇：張天生睇淡經紀業前景
近期股市波動，好多股民哭股喪、哀大時代，但股壇元老張天生就從中睇到行業生態，並擔憂滬港通、深港通等會為本港經紀帶來大茶飯，但張天生對本地經紀業前景睇得好淡，話唔單止係夕陽行業，仲就快進身為歷史陳迹添。
張天生縱橫本港股壇數十載，由七三年股災到今年四月嘅港股大時代，都親身見證。佢最近接受證券業協會自家刊物《證券人》訪問時話，即使滬港通同深港通令兩地市場流通，但無論幾多錢入嚟，本地經紀都無法獲益：「無論本港股市個餅做得幾大，本地經紀也只能分到一啲芝麻綠豆。」
佢話呢個互聯互通大時代，唔會為香港經紀業帶來改變。佢話依家香港租金貴、人工貴，（本地券商）每日打開門，電話都唔響，根本無做生意嘅心情，意興闌珊咁話。而且近年電子化交易好成功，九七年時股票交易仲係人手居多，依家興晒網上買賣，經紀業生存空間係咁縮。佢預計，日後本港只會剩番規模最大嘅券商能生存，券商行業將主要來自歐美、內地同埋部分客戶眾多嘅銀行，「強者愈強，弱者淘汰」。
